Fritz Gschweitl - Gratulation zum 85er

In Gschweitl Fritz sei 85a

Geburtstog feiern, des is kloar,

kou ma wirkli olle Joahr.

Owa wenns dounn nou dazua da 85. is,

is des a b’sounderer Grund, des is g’wiss.

Sunn und Reg’n, de wechsl’n si o’,

wia im Leb’n geht’s oamol bergauf und dounn bergo’.

Fröhlichkeit und Traurigkeit kumman immer wieder vor,

oba oas is gounz wichtig, trogs mit Humor.

Nur wer im Olter sein‘ Humor behält,

erreicht vül mehr als Gut und Geld.

Du muasst nur oll’s mit Fröhlichkeit sehn,

dounn is is Leb’n lebenswert und schön.

Wos fia uns lebenswert und schö’ is, wüll i jetzt nennan,

dass wir dir heit za dein 85a gratuliern kennan.

Sou a runder Geburtstog is a guata Grund,

dass ma z’ruckschaut zur Geburtsstund.

Am 11. Juni 1939 do hot es sich ergeb’n,

dass augfongt hot dei irdisches Leb’n.

Dei leibliche Mutter hot gwußt koan oundern Rot,

 weil’s di glei va da Hebamm weg zur Pflegemutter geb’n hot.

Sou bist du als znichtigs Biabal noch Oberrettenboch kemman

dei Pflegemutter hot di jo zerscht goa net wulln nehman,

 sie hot di oba dou gnomman, weils Erboarmen ghobt hot mit dir

und hot dounn oba a recht guat gschaut auf di.

Wia du dounn ölf Johr olt bist gwen,

hots in dein Leb‘n a wichtige Veränderung geb’n.

Du bist noch Kloapesendorf za ana weitschichtig’n Verwoundtschoft kemman

de hobn di glei adoptiert weils an Nochkumman hobn brauchn kennan.

Dadurch hot es si naturgemäß sou ergeb’n,

dass stott Nistelberger dir den Noumen Gschweitl hobn geb’n.

Deine Adoptiveltern hobn recht klua und oafoch den Olltog verbrocht,

sie worn recht fleißig und hobn houndwerklich fost olls sölba gmocht.

Du bist natürli überoll mit Eifer dabei gwen,

und host sou mounches mitkriagt fias spätere Leb’n.

Es is vül bet´worn und es wor a christliches Haus,

drum kennst di du bam Vorbet’n recht guat aus.

Va da Frau Falk is dir mit 18 Johr’n

is Vorbetergschäft übertrog’n worn.

Also übst du des jetzt scha 67 Johr aus

und bist in Romatschoch’n und Kloapesendorf bekounnt ba jedn Haus.

A fia oundere Ortschoftn bist du a g’frogter Mau,

weil des Vorbet‘n jo scha bold neamd mehr kau.

Ba da Breitenauer Wollfohrt, de du hülfst organisier’n,

host scha 36 mol als Vorbeter deafn mitmaschier’n.

Wenn ma zoumzöhlt wos du dabei an Schnops host mitgnumman,

tat sicher a gounzas Fassl zoumkumman.

Die Florianiwollfohrt noch Blaindorf, de immer am Florianitog wor,

begleitest du als Vorbeter scha über 25 Johr.

Fia die vül’n Stund‘n, de du als Vorbeter scha host bet’in dein Leb’n,

wird dir sicher unser Herrgott amol die Vergöltung geb’n.

Bam Pfoarrfest hülfst du im Kellnerstound mit scha vüle Joahr

bam Losverkaf’n fias Fest bist du oana der Best’n va da Pfoarr.

Is Pfoarrblattl austrog’n mocht dir a große Freid,

du host dabei sou mounche Sprüch‘ auf Loger fia die Leit.

Du tuast oba a sunst recht unterhaltli sein,

es folln dir immer a poar passende Witz ein.

Wir wulln dir heit amol sou richtig Danke sog’n,

dounkn fia deine Tätigkeit‘n, fia deine Mühen und s’Plog’n.

Liaba Fritz, i sogs mit Respekt und gounz off’n,

du host fia unser Pfoarr vül gleist und g’schoff’n.

Sou wia dir die Pflounz’n und Blumen Obwechslung bringen in Dein Olltog,

sou sullst du Glück und Freid erleb’n Tog fia Tog.

Der Olltog schaut jetzt fia di obwechslungreicher aus,

weil jetzt wohnen ba dir jo junge Leit im Haus.

Bam Schnopsbrennan pass bitte auf, dass nix passiert,

dass net gach amol da gounze Kess’l explodiert.

Olles wos du dir nou host vorgnumman,

sull, sou wia du wüllst a kumman.

Wir bitt’n di, dass du di net oll zu vül mehr tuast plog’n,

damit di deine Fiass und die Knia nou recht long trog’n.,

Wünsch’n dir G’sundheit, Glück und a erfüllt’s Leb’n,

unser Herrgott sull sein Seg’n dazua geb’n.